نه‌خۆشيێن سێكسي ئاريشه‌يێن مه‌زن په‌يدادكه‌ن، نيشانێن هنده‌ك ژوان ڤه‌دكێشن و ئه‌و پێ نزانن، هنده‌ك جاران ل ده‌مێ زارۆيه‌ك دهێته‌ ل سه‌ر دونيايێ ب رێكا وي نوشدار دزانن كۆ دايبابێن وي نه‌خۆشيه‌كا سێكسي يا وه‌كي سيلانێ هه‌نه‌، پێدڤيه‌ هه‌ڤژين خۆ ژ كريارا سێكسي دوور بكه‌ن ل ده‌مێ ئێك ژوان تووشي نه‌خۆشيه‌كا سێكسي دبيت و نابيت نه‌خۆش ب كه‌يفا خو ده‌رمانان ب كاربينيت.
عه‌بدولغه‌فور سلێمان، تايبه‌تمه‌ندێ نه‌خۆشيێن گولچيسكان و ميزه‌رۆيێ بو رۆژنامه‌يا ئه‌ڤرۆ دياركر كو ده‌ستنيشانكرنا نه‌خۆشيا سيلانێ پێدڤي ب پشكنينێن تاقيگه‌هێ نينه‌، ژبه‌ركو ئه‌و به‌ربه‌لاڤترين نه‌خۆشيێن سێكسي يه‌، به‌لێ دبيت پتر ژ ميكرۆبه‌كي ببنه‌ ئه‌گه‌رێ نه‌خۆشيێ و ئه‌گه‌ر چ به‌رسڤدان بۆ چاره‌سه‌ريێ نه‌بوون هنده‌ك جاران پێدڤيه‌ چاندن( زرع) ل تاقيگه‌هێ بهێته‌ كرن و گوت:چوار جورێن شلله‌يان ل جهێ ده‌ستئاڤێ ده‌ردكه‌ڤن ژوانژي (ده‌ستئاڤ، شله‌يه‌كێ بێ ره‌نگ و پيچه‌كێ چر ل ده‌مێ فيريانێن سێكسي په‌يدادبيت، شله‌يه‌كێ حه‌ليبي سه‌ر ب ره‌نگێ زه‌ر ڤه‌، پشتي خلاسبوون ژ كريارا سێكسي يان پشتي خه‌وينيێ ده‌ردكه‌ڤيت و حه‌يمه‌ن دگه‌لدانه‌ ول ده‌ڤ هنده‌كان ژي پشتي ده‌ستئاڤێ شله‌يه‌كێ چر ده‌ردكه‌ڤيت، ئه‌ڤه‌ هه‌موو د سروشتي نه‌ و يێن نه‌سروشتي ئه‌وه‌ كو ل ده‌مێ مرۆڤ دچيته‌ ده‌ستئاڤێ و ده‌ستنڤێژا مرۆڤي بسوژيت.
بو نموونه‌ ل ده‌مێ كه‌سه‌ك تووشي نه‌خۆشيا سيلانێ دبيت، به‌رده‌وام دێ شله‌يه‌كێ زه‌ر هاڤێت و ئه‌ندامێ سێكسي دێ سوور بيت و گه‌له‌ك ئێشيت و ل ده‌مێ دچيته‌ ده‌ستئاڤێ دێ گه‌له‌ك سوژيت ل وي ده‌مي يا سروشتي نينه‌ و دڤێت بهێته‌ چاره‌سه‌ركرن.
ل دور پرسياره‌كێ ئه‌رێ تووشبونا ژنا دوگيان ب نه‌خۆشيا سيلانێ كارتێكرنێ ل كورپه‌لێ وێ دكه‌ت؟
تايبه‌تمه‌ندێ نه‌خۆشيێن ميزه‌رۆيێ دياركر كو ئه‌گه‌ر ژنا دوگيان تووشي نه‌خۆشيێ بوو چ كارتێكرن ل سه‌ر كورپه‌لێ وێ نينه‌، به‌لێ ل ده‌مێ ئه‌و زاروك ب شێوه‌يه‌كێ سروشتي بهێته‌ ل سه‌ر دونيايێ دبيت ميكرۆبێ نه‌خۆشيێ بۆ وي بهێته‌ ڤه‌گوهاستن و ببيته‌ ئه‌گه‌رێ هه‌ودانا چاڤێن وي و هه‌ناسه‌دانا وي، ل ڤێرێ ژي گه‌له‌ك جاران دبيت دايك يان باب نه‌زانيت نه‌خۆشيا سيلانێ هه‌يه‌ و ل ده‌مێ زارۆك په‌يدادبيت و ئه‌ڤ هه‌ودانه‌ هه‌بن، ژنوو نوشدار دبێژيته‌ وان هوون د نه‌خۆشن.
به‌لێ چه‌وان دێ ژنا دوگيان زانيت ئه‌و تووشي نه‌خۆشيا سيلانێ بوويه‌؟
د.عه‌بدولغه‌فور دبێژيت: ده‌مێ ژن تووشي نه‌خۆشيا سيلانێ دبيت، نيشانێن نه‌خۆشيا وێ كێمترن ژ يێن زه‌لامي، ب شێوه‌يه‌كێ گشتي هنده‌ك شله‌مه‌نيێن نه‌سروشتي دێ دگه‌ل ده‌ستئاڤا وێ ده‌ركه‌ڤن و بێهنه‌كا نه‌خۆش ژێ دهێت و د خوريێت و ئێشان دكه‌ڤيتێ و ب تايبه‌ت ژي ل ده‌مێ كريارا سێكسي.
سه‌باره‌ت ده‌مێ ئێك ژ هه‌ڤژينان تووشي نه‌خۆشيا سيلانێ دبيت ئه‌رێ يا گرنگه‌ كو ژ كريارا سێكسي دوور بكه‌ڤن و بۆ چه‌ند ده‌مي؟
دكتوري گوت: هه‌لبه‌ت باشتره‌ خو ژ كريارا سێكسي دوور بكه‌ن، ئه‌گه‌ر نه‌ كه‌سێ دوێ ژي دێ تووشي نه‌خۆشيێ بيت، باشتره‌ بۆ ده‌مێ حه‌فتيه‌كێ ژ وه‌رگرتنا چاره‌سه‌ريێ ئه‌و كريارا سێكسي نه‌كه‌ن و ئه‌گه‌ر نه‌شيانه‌ خو، بلا كوندومان ب كاربينن وه‌كو رێيه‌ك بۆ پاراستنا لايێ دوێ ژ نه‌خۆشيێ.
تايبه‌تمه‌ندێ نه‌خۆشيێن ميزه‌رۆيێ دياركر ژي كۆ نه‌خۆشيێن سێكسي ب ره‌نگه‌كێ گشتي ب رێكا كريارێن سێكسي دهێنه‌ ڤه‌گوهاستن، به‌لێ دشياندايه‌ ب رێكا سێكسێ ب ده‌ڤي ژي بهێنه‌ ڤه‌گوهاستن و ديسان ب رێكا كه‌نالێن دايكێ بۆ زاروكێ وێ و ب كارئينانا جلكێن ژناڤدا يێن تووشبوي و ل كلينيكێن نه‌خۆشيێن ژنان ژي ب رێكا ب كارئينانا ئاميرێن نه‌ تافيلكري يێن پشكنينێ و ب رێكا ڤه‌گوهاستنا خوينا پيس بووي ب نه‌خۆشيا سفلسێ ژي دهێنه‌ ڤه‌گوهاستن و ديسان ب رێكا ده‌رزيكان ژي نه‌خۆشيێن وه‌كو ئيدزێ دهێنه‌ ڤه‌گوهاستن.
به‌لێ هنده‌ك زه‌لام دبێژن، ئه‌ز ژ مال ده‌رنه‌كه‌تيمه‌ و ژبلي هه‌ڤژينا خو من سێكس دگه‌ل چ ژنێن دي نه‌كريه‌ و تووشي نه‌خۆشيا سيلانێ بووينه‌، ئه‌ڤه‌ چاوايه‌؟
دكتوري گوت: ئه‌گه‌ر راسته‌ وه‌سان بيت وه‌كو ئه‌و دبێژيت، دبيت ب رێكا ئاميرێن پيس يێن كلينيكێن ژنان تووشي هه‌ڤژينا وي ببيت و بو وي هاتبيته‌ ڤه‌گوهاستن.
هنده‌ك كه‌س به‌ري يان پشتي كريارا سێكسي يا نه‌ ره‌وا ده‌رمانێن ئه‌نتي بايوتيك دخون و هزر دكه‌ن ئه‌ڤه‌ دێ وان ژ نه‌خۆشيێن سێكسي پارێزيت، ئه‌رێ راستيه‌ك بۆ هه‌يه‌؟
د. عه‌بولغه‌فور دياركر كو خوارنا ده‌رمانێن دژه‌ زينده‌وه‌ران دبيت ببيته‌ هانده‌ره‌ك كو نيشانێن سه‌ره‌كي يێن نه‌خۆشيێ ديارنه‌بن، به‌لێ نابيته‌ رێگر د روونه‌دانا نه‌خۆشيێ دا و دبيت ل پاشه‌رۆژێ ئه‌و تووشي سه‌رباركێن ب مه‌ترسي ببن، وه‌ك هه‌ودانا پرۆستاتان يان ته‌نكبوونا جهێ ده‌ستئاڤێ و نه‌زوكيێ و دبيت ل وان ده‌مان ئه‌و پێدڤي ب كريارێن نشته‌رگه‌ري ژي ببيت.
ل دور ڤه‌كێشانا چاره‌سه‌ريا نه‌خۆشيا سيلانێ و ئه‌رێ هنده‌ك جور هه‌نه‌ كو چاره‌سه‌ريا وان گيروببيت؟
د.عه‌بدولغه‌فور دبێژيت: پێدڤيه‌ ب ره‌نگه‌ك زانستي و درۆست چاره‌سه‌ريا نه‌خۆشيا سيلانێ بهێته‌ كرن و نابيت نه‌خۆش ب كه‌يفا خو ده‌رمانان ب كاربينيت يان بچيت ره‌ئيا هنده‌ك كه‌سێن نه‌شاره‌زا وه‌ربگريت و ژبوي كو نه‌خوشي نه‌هێته‌ ڤه‌گرتن و نيشانێن وێ دژوار

evroنه‌بن، پێدڤيه‌ نه‌خوش بۆ ده‌مێ دو حه‌فتيان ده‌رمانان وه‌ربگريت.

Comments (0)