وار/ قه‌یسه‌ر حه‌سه‌ن

رێڤه‌به‌رێ‌ گشتیێ‌ كاروبارێن ئێزدییان ل وه‌زاره‌تا ئه‌وقافا هه‌رێما كوردستانێ‌ خێری بۆزانی بۆ رۆژنامه‌یا وار دیاركر كو نهو پرۆژه‌یێ‌ نووژه‌نكرنا پرستگه‌ها لالش ژ ئالیێ‌ كۆمپانییه‌كا ئه‌لمانی ڤه‌ ماسته‌ر پلانه‌ك ژمه‌ها نیسانێ‌ بۆ هاتییه‌ دانان و ته‌كه‌زژیكر كو ل داویا ئه‌ڤێ‌ ماسته‌ر پلانێ‌ دێ‌ بشێوه‌یه‌كی رێكوپێك و شوونواری ده‌ست ب نووژه‌نكرنا لالش هێته‌كرن.
بۆزانێ‌ ئه‌گه‌رێن گیرۆبوونا ئه‌ڤێ‌ ماسته‌رپلانێ‌ بۆ وێ‌ یه‌كێ‌ ڤه‌گه‌راند كو پشتی سه‌رۆك بارزانی به‌رییا ساله‌كێ‌ سه‌را ده‌ڤه‌را شێخان كری، هه‌ر ل دووڤ را و دگه‌ل چه‌ندین زانا و ره‌وشه‌نبیر و كه‌سانێن به‌رنیاسێن كوردێن ئێزدی دسه‌ره‌دانا خوه‌ سه‌را پرستگه‌هێ‌ دا بوو و لدووڤ راسپاردێن سه‌رۆك بارزانی كو ئه‌ڤ په‌رستگه‌هه‌ ب جهه‌كی پیرۆز ل قه‌له‌م دا و بریارا نووژه‌نكرنا ئه‌ڤێ‌ په‌رستگه‌ها پیرۆزا جهێن زیاره‌تا ئێزدیێن كوردستانێ‌ و جیهانێ‌ ده‌رێخست. لێ‌ په‌یوه‌ندی ب چه‌ندین كۆمپانیێن بیانی هاته‌ كرن ژ بۆ دانانا ماسته‌رپلانه‌كێ‌، چ كۆمپانییان خوه‌ ل په‌رستگه‌هێ‌ نه‌كره‌ خودان له‌وا پشتی بریار ژئالیێ‌ سه‌رۆكی ڤه‌ هاتییه‌ ده‌رێخستن، گه‌له‌ك گیرۆبوو و هه‌تا ل مه‌ها نیسانێ‌ ژنوو كۆمپانییه‌كا ئه‌لمانی ب گوژمێن ( 850000 ) هه‌شت سه‌د و پێنجی هه‌زار دۆلاران ل سه‌ر بۆدجه‌یا حكومه‌تا هه‌رێما كوردستانێیه‌ كو كۆمپانی یا مژووله‌ ب دانانا ماسته‌ر پلانێ‌ ڤه‌ و كارێ‌ یێ‌ به‌رده‌وامه‌ .
بۆزانی سه‌رژمێریا ئێزدییان ل كوردستانێ‌ دیاركر كو دبنه‌ ( 500 ) هه‌زار كه‌س و رێژه‌یه‌كا زۆر ژ كوردێن ئێزدی ل ده‌رڤه‌ی وه‌لات ژی دژین و حكومه‌تا هه‌رێما كوردستانێ‌ پێنگاڤێن باش هاڤێتینه‌ بۆ خزمه‌تكرنا كوردێن ئێزدی و هه‌تا نهو ژی ل ده‌ڤه‌را شنگالێ‌ هێزێن پێشمه‌رگه‌ پاراستنا خه‌لكێ‌ ده‌ڤه‌رێ‌ ژبه‌ر ئێرشێن تیرۆری دكه‌ن، له‌وا ئیرۆ ئه‌ڤ چه‌نده‌ بوویه‌ ده‌لیڤێ‌ هندێ‌ كو هه‌می ئێزدیێن كوردستانێ‌ و ده‌رڤه‌ی وه‌لات سالانه‌ قه‌ستا په‌رستگه‌ها پیرۆزا لالش بكه‌ن ژبۆ گێرانا رێوره‌سمێن جه‌ژنا جه‌مایێ‌ كو هه‌ر سال بشێوه‌یه‌كێ‌ ئارام دهێته‌ گێران كو ئێكه‌م جه‌ژن و پیرۆزترین جه‌ژنه‌ ل جه‌م كوردێن ئێزدی و حكومه‌تا هه‌رێما كوردستانێ‌ ژی ب ئالیكاریا سه‌رۆك بارزانی كو ئه‌ڤ په‌رستگه‌ها لالش ب قوناغ قوناغ بهێته‌ نووژه‌نكرن و دێ‌ ببیته‌ مه‌زنترین پرۆژه‌ ل سه‌ر ئاستێ‌ ئێزدیخانێ‌ و هه‌ر كه‌سه‌كێ‌ ئێزدی ژی دێ‌ زانیت كو هه‌رێما كوردستانێ‌ پێنگاڤه‌كا ژهه‌ژی هاڤێتییه‌ بۆ كوردێن ئێزدی.
دیسان بۆزانی ئه‌و یه‌كه‌ژی ئاشكه‌راكر كو دده‌مێن نووژه‌نكرنێ‌ دا دێ‌ هه‌ر جه‌ژنا جه‌مایێ‌ ژی هێته‌ گێران وه‌كو هه‌رسال و چ رێك ژی ل هه‌ركه‌سه‌كی ئێزدی ناهێته‌گرتن ژبۆ پیرۆزكرنا جه‌ژنا جه‌مایێ‌.
دهێته‌ زانین كو په‌رسته‌گه‌ها لالش جهه‌كێ‌ كه‌ڤنارێ‌ كوردێن ئێزدییه‌ و ژ سه‌رانسه‌ری ئیراقێ‌ و جیهانێ‌ كوردێن ئێزدی ژبۆ گێرانا رێوره‌سمێن ئاینێ‌ ئێزدیان قه‌ست دكه‌نێ‌.

Comments (0)