موسیقا ، هه‌ر تشتى ژ بیرا من
دبت
تنێ چاڤێن ته‌ تێنه‌ .
داركێ هارێ كه‌مانێ
ب سه‌رخوه‌شى
لسه‌ر بیبیكێن چاڤێن ته‌ دله‌یزت
ئاواز دزێن و تۆ ژ دوورڤه‌
ده‌ستێ خوه‌ بلند دكى و
دبیژى :
دینو نه‌ خه‌ندقه‌ !!

***

ئه‌ز دێ پرچا ته‌ یا لبه‌ر
لێڤا باى
به‌رداى
ب سێ تلێن خوه‌ بادم
تو دێ ل خوه‌ زڤرى و
ناڤته‌نگا ته‌ دێ د ده‌ستێن مندا
خاڤ بت و
لێڤێن من یێن ئه‌ز نه‌شێمێ
دێ گه‌رده‌نا ته‌ ئالیسن
ببوره‌ خانم
دینم ئه‌ز و
ل به‌ر پێلێن ده‌ریایێ
دینتر دبم
ده‌مێ ته‌ دكراسێ كه‌سكێ
ب سێڤان ره‌شاندى
دبینم .
نو ، نو ، نو
چاڤپَن خوه‌ یێن پلنگى
ل من نه‌ئارهینه‌
ببینه‌ چه‌ند بایه‌كێ هینه‌
ل به‌ر لێڤێن ، شه‌رابێ ، وێنێ خوه‌ ل سه‌ر گرتى .
دینم جانێ
تو خودێ كى هایژ من هه‌به‌

***

دێ هێم، به‌لێ دێ هێم
دزانم چاڤێن ته‌ ل هیڤیا هاتنا بهارێ نه‌ .
دێ هێم ، به‌لێ دێ هێم و
لبن كه‌فشێ ته‌ یێ
ب ده‌زیێ زراڤێ ره‌شێ ستیانى
یێ تو هنده‌ شه‌ڤا پێ دخورێ
دێ ب چه‌ند گه‌زا ، ئیمزا خوه‌، لسه‌ر چێكم .
ئه‌و سیها ل بن خووها ئه‌ته‌كێ نوى
چه‌ند خوه‌شه‌ !!
ماچییه‌ هه‌كه‌ هندى خه‌ونه‌كێ بتنێ
ل بن بێهنێ ڤه‌دم؟؟

دزانم
ئاله‌كێن ته‌ یێن هێژیرى
نه‌شێن خوه‌ لبه‌ر مویێن سمپێلێن من بگرن .
چو نینه‌ جان
هێدى ، هێدى ، دێ فێر بێ
دێ خه‌ریب بێ

دخوینم خانم خه‌ونێن ته‌
دخوینێ خانم خه‌ونێن من
ئێكین ئه‌م
ئه‌وه‌ مه‌ ئێكدو نه‌دیتى .

27 -29-10- 2009

duhokwriters

Comments (0)