•به‌ری هه‌ر تشتی ئەز ب ناڤێ TRT6 گه‌له‌ك سوپاس دكم. ژ بۆ مه‌ ئەڤ هه‌ڤپه‌یڤین, روومه‌ته‌كه‌ مه‌زن و دلخوه‌شیه‌ك مه‌زنه‌, هون ب خێر هاتنه‌ توركیه‌ و TRT6 و ستودیۆیا مه‌.

سه‌رۆكێ هه‌رێما كوردستانێ: كه‌ره‌مداربی زۆر مه‌منوون.

• ئە‌زبه‌نی هوون پشتی 6 سالان هاتنه‌ توركیه‌ و وه‌ بەرێز ئاهمه‌ت داڤوت ئۆگلو و سه‌رۆك وه‌زیر ئە‌ردۆگان ره‌ هه‌ڤدیتنه‌ك پێك ئانی. گه‌لۆ هه‌ڤدیتنێن وه‌ چاوا ده‌رباس بوون؟

سه‌رۆكێ هه‌رێما كوردستانێ: ب خوه‌دێ هه‌ڤدیتنێن مه‌ پر باش بوون, مه‌ به‌هسا هه‌موو بابه‌تان كرن, هه‌ڤدوو تێگهشتنه‌كه‌ باش هه‌بوو ل ناڤبه‌را مه‌, ئەو ساریا كو به‌ری نها درووست بووبوو نه‌ما. ژ ئیرۆ پێ دا دێ پێوه‌ندیێن مه‌ ببن پێوه‌ندیێن دۆستانه‌ و برایانه‌ و ئەم هێڤیدارن كو خێرا هه‌موو مڵه‌تان, هه‌م مڵه‌تێ كورد و هه‌م مڵه‌تێ توركیه‌ و عیراق ب گشتی كو خێرا هه‌موو ئالیه‌ك تێدا هه‌به‌.

• د گه‌ل سه‌ردانا وه‌, پێوه‌ندیێن د ناڤبه‌را توركیه‌ و هه‌رێما كوردستانێ ده‌، ره‌وش چاوایه‌ و پێوه‌ندیێن وه‌ ب چ ئالیه‌ك ڤه‌ دمه‌شن؟

سه‌رۆكێ هه‌رێما كوردستانێ: ئە‌ڤ سه‌ردانا من دێ پێوه‌ندیان ببه‌ قۆناخه‌كه‌ دن, قۆناخه‌كه‌ نوو و ئەو قۆناخ ژی قۆناخا هه‌ڤدوو تێگهشتن و ئالیكاری و هه‌ڤكاری و پشته‌ڤانیا هه‌ڤدوو دبه‌.

• ژ بۆ كو د ناڤبه‌را توركیه‌ و گه‌لێ هه‌رێما كوردستانێ دا ژ بۆ دۆستانیێ چ پێویسته؟

سه‌رۆكێ هه‌رێما كوردستانێ: ب ته‌نێ پێكڤه‌ روونشتن و هه‌ڤدوو تێگهشتن پێویسته‌, ژ به‌ر كو ئەم هه‌ڤالێ هه‌ڤن و ئەم برایێ هه‌ڤن ئەم جیرانێن هه‌ڤن و به‌رژه‌وه‌ندیێن مه‌ هه‌موو پێكڤه‌ نه‌, دڤێ ئەم پێكڤه‌ ب برایانه‌ بژین, نه‌ كو ب نه‌خوه‌شی و تووندوتیژیێ.

• گه‌لۆ پێوه‌ندیێن وه‌ یێن ئابۆری ل ناڤبه‌را توركیه‌ و هه‌رێما كوردستانێ ده‌ چاوانه‌؟

سه‌رۆكێ هه‌رێما كوردستانێ: ئابۆریا مه‌ پر باشه‌ و زێده‌ترین كۆمپانیایێن ل هه‌رێما كوردستانێ كار دكن, كۆمپانیایێن توركی نه‌.

• د ناڤبه‌را تركیه‌ و هه‌رێما كوردستانێ ده‌ مژارا ته‌رۆرێ پرسگرێكه‌كه‌ مه‌زنه‌ و ژ بۆ چاره‌سه‌ركرنا ڤێ پرسگرێكێ هوون چ هزر دكن؟

سه‌رۆكێ هه‌رێما كوردستانێ: ئە‌ز وها دبینم كو ئەو پرۆسه‌یا جه‌نابێ سه‌رۆك وه‌زیر و پارتیا وان ده‌ستپێكریه‌, و ئەو سیاسه‌تا ڤه‌كرنێ ئەو باشترین رێیه‌ ژ بۆ چاره‌سه‌ركرنا ڤێ پرسگرێكێ و ئەڤ مه‌سه‌له‌ ب شه‌ر چاره‌سه‌ر نابه‌ و دڤێ ب ئاوایه‌كه‌ ئاشتی و ده‌مۆكراتیك چاره‌سه‌ر ببه‌. ئە‌و پرۆسه‌یا كو جه‌نابێ سه‌رۆك وه‌زیر ده‌ستپێكریه‌, ئەم پشتگریا وێ پرۆسه‌یێ دكین و هێڤیا من ئەوه‌ كو گه‌لێ كورد ژی پشتگریا ڤێ پرۆسه‌یێ بكه‌.

• ل ڤێ چارچۆوه‌یێ ده‌ وه‌ ل ئە‌نقه‌رێ ل گه‌ل ئاهمه‌ت تورك و سه‌لاهەددین ده‌میرتاش ژی هه‌ڤدیتنه‌ك پێك ئانی. گه‌لۆ هوون ل سه‌ر مژارێ ل گه‌ل وان ئاخافتن؟

سه‌رۆكێ هه‌رێما كوردستانێ: به‌لێ ئەم ئاخافتن و من ژ وان ره‌ ژی گۆت كو رایا من ئەڤه‌ یه‌ كو هوون پشتگریێ ل پرۆسه‌یا جه‌نابێ ئە‌ردۆگان بكن, هه‌ر چه‌نده‌ مومكینه‌ ئاسته‌نگی گه‌له‌كن و پێنگاڤ وه‌كی كو پێویست نه‌هاتنه‌ ئاڤێتن, لێ ئەڤ پرۆسه‌ پرۆسه‌یه‌كه‌ گرینگه‌ ژ بۆ گه‌لێ كورد و دڤێ هوون پشتگریا ڤێ پرۆسه‌یێ بكن. ئە‌و زێده‌تر ل به‌رژه‌وه‌ندیا گه‌لێ كورد دایه‌ كو هوون پشتگریێ لێ بكن.

• هوون ڤێ پێڤاژۆیا پێشڤه‌برنا ڤه‌كرنا ده‌مۆكراتیك ل تركیێ چاوا دبینن؟

سه‌رۆكێ هه‌رێما كوردستانێ: ب خوه‌دێ ل گۆر من پێنگاڤێن باش هاتنه‌ ئاڤێتن لێ به‌لێ ئاسته‌نگی ژی گه‌له‌كن.

• هوون ترت6 چاوا دبینن؟

سه‌رۆكێ هه‌رێما كوردستانێ: ئە‌ڤه‌ ژی پێنگاڤه‌كه‌ گه‌له‌ك گرینگه‌, ل توركیه‌ ته‌له‌ڤزیۆنه‌ك ب زمانێ كوردی بێته‌ ڤه‌كرن و وه‌شانێ بكه‌ و كوردی باخڤن, ئەڤه‌ ب خوه‌ ل توركیه‌ پێنگاڤه‌كه‌ مه‌زنه‌.

• هوون به‌رنامه‌یێن وی چاوا دبینن؟

سه‌رۆكێ هه‌رێما كوردستانێ: به‌رنامه‌یێن وێ ژی باشن, ئەز گه‌له‌ك جاران ته‌ماشه‌ دكم.

• ژ هه‌رێما وه‌ گه‌له‌ك ته‌له‌فۆنی به‌رنامه‌یێن مه‌ دكن و ته‌ڤلی به‌رنامه‌یێن مه‌ دبن, گه‌لۆ هوون هه‌ری زێده‌ كیژان به‌رنامه‌یا مه‌ ته‌ماشه‌ دكن؟

سه‌رۆكێ هه‌رێما كوردستانێ: ب خوه‌دێ من گه‌له‌ك ده‌م توونه‌, ئەز ته‌ماشا ته‌له‌ڤزیۆنان بكم. لێ به‌لێ گه‌له‌ك جاران من ته‌ماشا ته‌له‌ڤزیۆنا ترت6 كریه‌ و به‌رنامه‌یێن وێ ژی گه‌له‌ك خوه‌شن.

• د ده‌ما كو ل به‌رنامه‌یا كه‌سكه‌سۆر ده‌ د ده‌ربارێ ژیانا باڤێ وه‌ یێ برێز مسته‌فا بارزانی ده‌ به‌رنامه‌یه‌ك هاته‌ به‌لاڤكرن, وه‌ چ هه‌ست كر؟

سه‌رۆكێ هه‌رێما كوردستانێ: من وێ به‌رنامه‌یێ دیت و براستی به‌رنامه‌یه‌ك باش بوو و ئەم ده‌ستخوه‌شیێ ل وان دكین كو ئەوێن وێ به‌رنامه‌یێ ئاماده‌ كرنه‌. براستی ژی به‌رنامه‌یه‌كه‌ گه‌له‌ك تایبه‌ت بوو.

evro

Comments (0)